Saturday, 13 April 2013

Bhartiya kala me Ravindra Nath Tagore ka yogdan



Wishva manch par kavi ke roop me vikhyat Ravindra Nath Tagore adhunik kala ke janamdata the. Bhartiya kala me Rabindra Nath ka sabse bada yogdan yahi hai ki unhone ise ek naya aayam diya tatha ise wishva vyapi banaya aur naye kalakaro ke liye marg prashast kiya. Isse pahle jo chitra bharat me ban rahe the ve praya devi-devtao se sambandhit vishyo par hi adharit the ya ese chitro ka prachlan tha jo jan samanya ki ruchi ke anusar ho tatha jinse aam jan manas santusht ho sake. Kalakar ki swayam ki abhivyakti prakat nahi ho pati thi. Rabindra nath ne apni chitrakala ke dwara sari  rudhiyo ko kahi pichhe chhod diya tha. Swayam Rabindra Nath ne kaha hai ki, "log mujhse aksar mere chitro ka arth puchhte hai kintu apne chitro ki bhanti me bhi chup rehta hu." Unki sampurn kala ka ek mahatvpurn sandesh yeh hai ki manavta swayam ko kalabhiwayakti ke dwara mukt anubhav kar sakti hai aur antakaran me hazaro varsho se chhipe manobhavo ko roop de sakti hai.Rabindra Nath ke kala wyaktitva ka wyakt paksh  asandigdh aur asankhya roopo me viksit-vistrit hota raha hai. Apne chitro me adbhut-andekhi sanrachnao ke bare me Rabindra Nath ne swayam kaha hai,"avyakt hi
vyakt hua hai,jo pehle prakash me nahi tha, vahi prakashit hua hai." praya rachnakar ki nitant niji duniya, jise usne isi prakat duniya me rehkar samanantar dhhang se banayi hoti hai, uski kala me vyakt hoti hai.Rabindra Nath ki kala chetna ki inhi sthitiyo ke karan
amurtan hai. Unki kala ke manav, pashu,pakshi se aakar to hai lekin parichit ya gyat mana, pashu-pakshi jese nahi hai.
           Rabindra Nath ke chitra pakshi me pakshi kisi pakshi jesa hi dikhta hai lekin weh dekha hua,gyat va parichit nahi hota. Rabindra Nath se puchha gaya ki unke pakshi pehle to kabhi dekhe nahi gaye to unhone kaha ,"dianosaur ya Zebra bhi unse pahle kabhi dekhe nahi gaye the! Unke chitro ko dekhne se pratit hota hai jese mano ve apni kalpnao ko chhu lena chahte the.Rabindra Nath ke kale,ghane,gehan jungle ki ot me sudur koi aag, koi aanch,koi prakash,kisi aprichit antheen subah ki  jhalak hai.ahat hai. Jo puri tarah spasht nahi hai.vyakt nahi hai. Man ki saman prakriti,saman manobhav dekhe ja sakte hai.Rabindra Nath ki kala ki yeh visheshta rahi hai ki unhone wishva ke kisi desh athva kalakar ki anukriti nahi ki, unki kala purn roop se adhunik hai.
            Rabindra Nath se pehle Bharat me is tarah ki kala ka prachlan nahi tha unhone ek nayi vidha ko janam diya tatha Bhartiya kalakar jo ab dharmik athva samajik ya aam jan jivan ke chitra hi ankit kar raha tha use apni abhivyakti karne ka avsar prapt hua isiliye Rbindra Nath ko adunik kala ke praneta ke roop me jana jata hai.
There was an error in this gadget